Daily Archives: April 22, 2012

ಬಿಳಿ ಸಾಹೇಬನ ಭಾರತ (ಕಾರ್ಬೆಟ್‌ ಕಥನ-17)


– ಡಾ.ಎನ್.ಜಗದೀಶ್ ಕೊಪ್ಪ


 

ಮಧ್ಯಾಹ್ನದವರೆಗೆ ಪ್ರವಾಸಿ ಮಂದಿರದಲ್ಲಿ ವಿಶ್ರಾಂತಿ ಪಡೆದು ಚೇತರಿಸಿಕೊಂಡ ಕಾರ್ಬೆಟ್‌, ಭೋಜನದ ನಂತರ ಬದ್ರಿಯನ್ನು ಕರೆದುಕೊಂಡು ಮತ್ತೇ ಹೋರಿಯ ಕಳೇಬರವಿದ್ದ ಸ್ಥಳಕ್ಕೆ ಧಾವಿಸಿದ. ಕಳೆದ ರಾತ್ರಿ ಮಳೆ ಬಿದ್ದ ಪರಿಣಾಮ ಹುಲಿಯ ಹೆಜ್ಜೆಗುರುತುಗಳು ಒದ್ದೆ ನೆಲದ ಮೇಲೆ ಮೂಡಿದ್ದವು. ಈ ನರಭಕ್ಷಕ ಕೂಡ ವಯಸ್ಸಾದ ಹುಲಿ ಎಂಬುದನ್ನ ಕಾರ್ಬೆಟ್‌ ಹೆಜ್ಜೆ ಗುರುತಿನ ಮೂಲಕ ಖಚಿತಪಡಿಸಿಕೊಂಡ. ಕಳೆದ ರಾತ್ರಿ ತನ್ನ ಮೇಲೆ ಎರಗಲು ಪ್ರಯತ್ನಿಸಿದ್ದ ಸ್ಥಳದಿಂದ ಅನತಿ ದೂರದ ಪೊದೆಯೊಂದಕ್ಕೆ ನಡೆದು ಹೋಗಿರುವ ಗುರುತು ಪತ್ತೆ ಹಚ್ಚಿದ ಕಾರ್ಬೆಟ್‌ಗೆ ನರಭಕ್ಷಕ ಹತ್ತಿರದಲ್ಲೇ ವಿಶ್ರಾಂತಿ ಪಡೆಯುತ್ತಿದೆ ಎಂಬುದು  ಖಾತರಿಯಾಯಿತು. ಇದನ್ನು ಕೂಡ ಚಂಪಾವತ್ ನರಭಕ್ಷಕನನ್ನು ಕೊಂದ ರೀತಿಯಲ್ಲೇ ಗ್ರಾಮಸ್ಥರ ಸಹಾಯದಿಂದ ಬೇಟೆಯಾಡಬೇಕು ಎಂದು ನಿರ್ಧರಿಸಿದ ಅವನು, ಬದ್ರಿಯ ಜೊತೆ ವಾಪಸ್ ಪ್ರವಾಸಿ ಮಂದಿರಕ್ಕೆ ಹಿಂತಿರುಗಿದ

ಸಂಜೆ ಕತ್ತಲಾಗುವ ಮುನ್ನವೇ ನರಭಕ್ಷಕನನ್ನು ಬೇಟೆಯಾಡಬೇಕು ಎಂದು ನಿರ್ಧಾರವಾದ ಕೂಡಲೇ ಹುಲಿಯನ್ನು ಬೆದರಿಸಲು ಒಂದಷ್ಟು ಜನರನ್ನು ಕಲೆ ಹಾಕಲು ನಿರ್ಧರಿಸಿದ ಕಾರ್ಬೆಟ್‌ ಮುಕ್ತೇಶ್ವರದ ಅಂಚೆಕಛೇರಿ ಬಳಿ ಬಂದು ಜನರಿಗೆ ಪರಿಸ್ಥಿತಿಯನ್ನು ವಿವರಿಸಿದ. ನಂತರ  ಬದ್ರಿಯ ನೆರವಿನೊಂದಿಗೆ ಮುವತ್ತು ಜನರನ್ನು ಕರೆದುಕೊಂಡು ತನ್ನ ಸಹಾಯಕರೊಡನೆ ನರಭಕ್ಷಕ ಮಲಗಿದ್ದ ಪೊದೆಯತ್ತ ಹೆಜ್ಜೆ ಹಾಕತೊಡಗಿದ..ಕಳೆದ ರಾತ್ರಿಯ ಭೀಕರ ಅನುಭವ ಅವನಲ್ಲಿ ನರಭಕ್ಷಕ ಹುಲಿಯನ್ನು ಕೂಡಲೇ ಬೇಟೆಯಾಡಬೇಕೆಂಬ ಆಕ್ರೋಶವನ್ನು ಹೆಚ್ಚಿಸಿತ್ತು.

ಹೋರಿಯ ಕಳೇಬರವಿದ್ದ ಸುಮಾರು 100 ಅಡಿ ದೂರದಲ್ಲಿ ದಟ್ಟವಾದ ಪೊದೆಯೊಳಗೆ ನರಭಕ್ಷಕ ಆಶ್ರಯ ಪಡೆದಿತ್ತು. ಸಮತಟ್ಟಾದ ನೆಲದಿಂದ ದೂರದಲ್ಲಿ ಸ್ವಲ್ಪ ಇಳಿಜಾರಿನಿಂದ ಕೂಡಿದ್ದ ಆ ಸ್ಥಳದಿಂದ ಯಾವುದೇ ಕಾರಣಕ್ಕೂ ಹುಲಿ ನುಸುಳಿ ಮತ್ತೆ ಬಯಲು ಪ್ರದೇಶಕ್ಕೆ ಹೋಗಬಾರದೆಂದು ಗ್ರಾಮಸ್ಥರಿಗೆ ಎಚ್ಚರಿಸಿ ಎಲ್ಲರನ್ನೂ ಆ ತಗ್ಗು ಪ್ರದೇಶದ ಮೇಲ್ಭಾಗದಲ್ಲಿ ರಕ್ಷಣೆಗಾಗಿ ನಿಲ್ಲಿಸಿದ. ಅದೇ ವೇಳೆ ತನ್ನ ಸಹಾಯಕ ಗೋವಿಂದಸಿಂಗ್ ಎಂಬಾತನಿಗೆ ಕಾರ್ಬೆಟ್‌ ಸೂಚನೆ ನೀಡುತಿದ್ದಾಗ, ಕಾರ್ಬೆಟ್‌ ನಿಂತಿದ್ದ ಸ್ಥಳದ ಹಿಂಬದಿಯಲ್ಲಿ 400 ಅಡಿಯ ದೂರದಲ್ಲಿ ನರಭಕ್ಷಕ ಮೇಲಿನ ಸಮತಟ್ಟಾದ ಪ್ರದೇಶದಲ್ಲಿದ್ದ ಕುರುಚಲು ಗಿಡಗಳ ನಡುವೆಯಿಂದ ಮತ್ತೆ ತನ್ನ ಬೇಟೆಯ ಆಹಾರವಿದ್ದ ಸ್ಥಳದತ್ತ ತೆರಳುತ್ತಿರುವುದನ್ನು ಗಮನಿಸಿದ ಗೋವಿಂದಸಿಂಗ್,  ಈ ಬಗ್ಗೆ ಏನೂ  ಮಾತನಾಡದೆ ಬರೀ ಕಣ್ಣಿನಲ್ಲೇ ಕಾರ್ಬೆಟ್‌ಗೆ ಸೂಚನೆ ನೀಡಿದ. ಆಶ್ಚರ್ಯ ಮತ್ತು ಕುತೂಹಲದಿಂದ ಹಿಂತಿರುಗಿ ನೋಡಿದ ಕಾರ್ಬೆಟ್‌ಗೆ  ಗಿಡಗಳ ನಡುವೆ ನಿಧಾನವಾಗಿ ತೆವಳುತ್ತಾ , ಪೊದೆಯತ್ತ ಸಾಗುತಿದ್ದ ನರಭಕ್ಷಕನ ದರ್ಶನವಾಯಿತು.  ಕೂಡಲೇ ಯಾರೊಬ್ಬರೂ ಗದ್ದಲ ಮಾಡಬಾರದೆಂದು ಎಲ್ಲರಿಗೂ ತುಟಿಯ ಮೇಲೆ ಬೆರಳಿಟ್ಟು ಮೌನವಾಗಿ ಎಚ್ಚರಿಸಿ. ತನ್ನ ಜೋಡು ನಳಿಕೆಯ ಬಂದೂಕದೊಂದಿಗೆ ಕಾರ್ಬೆಟ್‌ ಪೊದೆಯತ್ತ ಮೆಲ್ಲ ಮೆಲ್ಲನೆ ಹೆಜ್ಜೆ ಇರಿಸುತ್ತಾ ನಡೆದ.
 
ನರಭಕ್ಷಕ ವಿಶ್ರಾಂತಿ ಪಡೆಯುತಿದ್ದ ಜಾಗದ ಸುತ್ತಮುತ್ತ ಲಂಟಾನದ ಗಿಡಗಳು ದಟ್ಟವಾಗಿ ಬೆಳೆದುನಿಂತ ಕಾರಣ ಕಾರ್ಬೆಟ್‌ ಗಿಡಗಳ ಕೆಳಗೆ ತೂರಿ ಸುರಂಗ ಮಾರ್ಗದಲ್ಲಿ ಚಲಿಸುವಂತೆ ತೆವುಳುತ್ತಾ ಸಾಗತೊಡಗಿದ. ಅತ್ಯಂತ ಕಡಿದಾಗಿದ್ದ ಆ ಜಾಗದಲ್ಲಿ ಒಮ್ಮೆ ಅವನ ಹಿಡಿತಕ್ಕೆ ಯಾವ ಗಿಡದ ಆಸರೆಯೂ ಸಿಗದೆ ಕೆಳಕ್ಕೆ ಜಾರಿದಾಗ ಅವನು ಧರಿಸಿದ್ದ ಹ್ಯಾಟ್ ಗಿಡಗಳ ನಡುವೆ ಸಿಕ್ಕಿ ಹಾಕಿಕೊಂಡಿತು. ಕೊನೆಗೆ ಒಂಡು ಗಿಡದ ಬೇರನ್ನು ಬಲವಾಗಿ ಹಿಡಿದುಕೊಂಡು ಕಾರ್ಬೆಟ್‌ ಸಾವರಿಸಿಕೊಳ್ಳತಿದ್ದಂತೆ, ಪಕ್ಕೆದ ಪೊದೆಯಲ್ಲಿ ಕೇವಲ 40 ಅಡಿ ದೂರದಲ್ಲಿ ನರಭಕ್ಷಕ ಮೂಳೆ ಜಗಿಯುತ್ತಿರುವ ಸದ್ದು ಕೇಳ ಬರತೊಡಗಿತು. ಶಬ್ದ ಬರುತಿದ್ದ ದಿಕ್ಕಿನತ್ತ ನೋಡುತ್ತಾ, ಬಂದೂಕವನ್ನು ಎದಗೇರಿಸಿದ ಕಾರ್ಬೆಟ್‌ ನರಭಕ್ಷಕ ಕುಳಿತಿರುವ ಸುಳಿವನ್ನು ಪತ್ತೆ ಹಚ್ಚುವ ಸಲುವಾಗಿ ಮೆಲ್ಲ ಮೆಲ್ಲನೆ ಕುಳಿತ ಸ್ಥಿತಿಯಲ್ಲಿ ಕದಲತೊಡಗಿದ. ಅದೇ ವೇಳೆಗೆ ಹಿಂಬದಿಯಲ್ಲಿ ಸಹಾಯಕ  ಗೋವಿಂದಸಿಂಗ್ ಗಿಡದಲ್ಲಿ ಸಿಲುಕಿದ್ದ  ಕಾರ್ಬೆಟ್‌ನ ಹ್ಯಾಟ್‌ನೊಂದಿಗೆ ಅಲ್ಲಿಗೆ ಹಾಜರಾದ. ಅವನನ್ನು ಹಿಂದಕ್ಕೆ ತಳ್ಳಿದ ಕಾರ್ಬೆಟ್‌ ಮಾತನಾಡುವುದಿರಲಿ, ಉಸಿರು ಕೂಡ ಬಿಡದಂತೆ ಸನ್ನೆ ಮೂಲಕ ಅವನಿಗೆ ಎಚ್ಚರಿಸಿದ.

ನರಭಕ್ಷಕ ಕುಳಿತಿದ್ದ ಜಾಗಕ್ಕೆ ಇಪ್ಪತ್ತು ಅಡಿ ಅಂತರವಿರುವಷ್ಟು ಸನಿಹಕ್ಕೆ ಬಂದ ಕಾರ್ಬೆಟ್‌ ಒಂದು ಅಂದಾಜಿನ ಮೇಲೆ ಮೂಳೆಯ ಜಗಿಯುವಿಕೆ ಶಬ್ದವನ್ನೇ ಗುರಿಯಾಗಿಸಿಕೊಂಡು ಬಂದೂಕದಿಂದ ಗುಂಡು ಹಾರಿಸಿದ. ದುರದೃಷ್ಟವಶಾತ್ ಅದು ನರಭಕ್ಷನಿಂದ ಕೇವಲ ಅರ್ಧ ಅಡಿ ದೂರದಲ್ಲಿ ಹಾಯ್ದು ಹೋಗಿ ಮರವೊಂದಕ್ಕೆ ಬಡಿಯಿತು. ಗುಂಡಿನ ಶಬ್ದಕ್ಕೆ ಬೆಚ್ಚುವ ಬದಲು ಕೆರಳಿ ನಿಂತ ನರಭಕ್ಷಕ ಘರ್ಜಿಸುತ್ತಾ ಸುತ್ತೆಲ್ಲಾ ನೋಡತೊಡಗಿತು.

ನರಭಕ್ಷಕ ಮನುಷ್ಯ ವಾಸನೆಯನ್ನು ಗ್ರಹಿಸಿ ತನ್ನತ್ತಾ ಬರುತ್ತಿರುವುದನ್ನು ಗಮನಿಸಿದ ಕಾರ್ಬೆಟ್‌ ನಿಧಾನವಾಗಿ ಹಿಂದಕ್ಕೆ ಚಲಿಸಿ ಕಲ್ಲು ಬಂಡೆಯೊಂದನ್ನು ತನ್ನ ಬೆನ್ನಿಗೆ ಆಸರೆಯಾಗ್ಟ್ಟುಕೊಂಡು ಕಾಯತೊಡಗಿದ. ಕೆಲವೇ ಕ್ಷಣಗಳಲ್ಲಿ ಅವನ ಎದರು ನರಭಕ್ಷಕ ಪ್ರತ್ಯಕ್ಷವಾಗಿಬಿಟ್ಟಿತು.  ಕೇವಲ ಆರು ಅಡಿಯಷ್ಟು ಹತ್ತಿರ ಬಂದು ಮುಖಾಮುಖಿಯಾದ ಇದನ್ನು ಹೊಡೆಯಲು ಇದೇ ಸರಿಯಾದ ಸಮಯವೆಂದು ನಿರ್ಧರಿಸಿದ ಕಾರ್ಬೆಟ್‌ ಎದೆಗುಂದದೆ ತಕ್ಷಣವೇ ಗುಂಡು ಹಾರಿಸಿದ. ಗುಂಡು ನೇರವಾಗಿ ನರಭಕ್ಷಕ ಕುತ್ತಿಗೆಯ ಹಿಂಭಾಗಕ್ಕೆ ತಗುಲಿತು. ಅತಿ ಸನಿಹದಿಂದ ಗುಂಡು ಹಾರಿಸಿದ ಪರಿಣಾಮ ಒಂದೇ ಗುಂಡಿಗೆ ಅದು ನರಳಾಟ ಅಥವಾ ಯಾವುದೇ ಚೀತ್ಕಾರವಿಲ್ಲದೆ ದೊಪ್ಪನೆ ನೆಲಕ್ಕೆ ಉರುಳಿಬಿತ್ತು. ಗುಂಡು ನರಭಕ್ಷಕನ ದೇಹವನ್ನು ಸೀಳಿ ಹೊರಗೆ ಹಾರಿ ಹೋಗಿತ್ತು. ಕಾರ್ಬೆಟ್‌ ತನ್ನ ಸಹಾಯಕರು ಮತ್ತು ಗ್ರಾಮಸ್ಥರ ಸಮ್ಮುಖದಲ್ಲಿ ನರಭಕ್ಷನನ್ನು ಪರಿಶೀಲಿಸಿದಾಗ ಅದು ಒಂಟಿ ಕಣ್ಣಿನ ಮುದಿಯಾದ ಹೆಣ್ಣು ಹುಲಿಯಾಗಿತ್ತು. ಪ್ರಾಣಿಗಳನ್ನು ಬೇಟೆಯಾಡಲು ಸಾಧ್ಯವಾಗದೆ ಅಸಹಾಯಕ ಸ್ಥಿತಿಯಲ್ಲಿದ್ದ ಈ ಹೆಣ್ಣು ಹುಲಿ ಪೊದೆಯಲ್ಲಿ ಕುಳಿತು ಕಾಡುಕೋಳಿಗಳನ್ನು ಬೇಟೆಯಾಡುತಿತ್ತು ಇಂತಹದ್ದೇ ಒಂದು ಸಂದರ್ಭದಲ್ಲಿ ಪೊದೆಯ ಬಳಿ ಕಟ್ಟಿಗೆ ಅರಸಲು ಬಂದ ಮಹಿಳೆಯನ್ನು ಬಲಿ ತೆಗೆದುಕೊಂಡು.ನಂತರ ಇದು ತನ್ನ ಬೇಟೆಗಾಗಿ ಮನುಷ್ಯರನ್ನು ಬೆನ್ನಟ್ಟಿ ನಾಲ್ವರನ್ನು  ಬಲಿ ತೆಗೆದುಕೊಂಡಿತ್ತು.

ಈ ನರಭಕ್ಷಕನ ಶಿಕಾರಿಯ ನಂತರ ಪನಾರ್ ಎಂಬ ಹಳ್ಳಿಯಲ್ಲಿ ನರಭಕ್ಷಕ ಚಿರತೆ ಕಾಣಿಸಿಕೊಂಡು ಮನುಷ್ಯರನ್ನು ಬೇಟೆಯಾಡುತ್ತಿರುವ ಸುದ್ಧಿ ಮತ್ತೆ ಕಾರ್ಬೆಟ್‌ಗೆ ತಲುಪಿತು . ಹಲವಾರು ವೈಯಕ್ತಿಕ ಕೆಲಸಗಳ ಒತ್ತಡದ ನಡುವಯೂ ಕೂಡೆ ಪನಾರ್ ಎಂಬ ಸಣ್ಣ ಹಳ್ಳಿಗೆ ಬೇಟಿ ನೀಡಿದ ಕಾರ್ಬೆಟ್‌ ಪಕ್ಕದ ಡೊಲ್ ಎಂಬ ಹಳ್ಳಿಯಲ್ಲಿದ್ದ ಪ್ರವಾಸಿ ಮಂದಿರದಲ್ಲಿ ಉಳಿದುಕೊಂಡ.

ಪನಾರ್ ಹಳ್ಳಿಯ ಹತ್ತಿರದ ಗುಡ್ಡವೊಂದನ್ನು ತನ್ನ ನೆಲೆಯಾಗಿಸಿಕೊಂಡಿದ್ದ ಚಿರತೆ ರಾತ್ರಿಯ ವೇಳೆ ಮನುಷ್ಯರನ್ನು ಬೇಟೆಯಾಡುತಿತ್ತು. ಕಾರ್ಬೆಟ್‌ ಪ್ರವಾಸಿ ಮಂದಿರದಲ್ಲಿ ಉಳಿದುಕೊಂಡಿದ್ದ ದಿನವೇ ಚಿರತೆ ಮಹಿಳೆಯೊಬ್ಬಳನ್ನು ಕೊಂದು ಗುಡ್ಡಕ್ಕೆ ಹೊತ್ತೊಯ್ದು ತಿಂದು ಹಾಕಿತ್ತು. ಪನಾರ್ ಹಳ್ಳಿಯ ಯುವ ರೈತನೊಬ್ಬ ರಾತ್ರಿ ತನ್ನ ಮನೆಯ ಬಾಗಿಲು ತೆರದು ಮಲಗಿದ್ದಾಗ ಆತನ ಹದಿನೆಂಟು ವರ್ಷದ ಹೆಂಡತಿಯನ್ನ ನರಭಕ್ಷಕ ಚಿರತೆ ಬಲಿತೆಗೆದುಕೊಂಡಿತ್ತು. ಮರುದಿನ ಮನೆಗೆ ಬೇಟಿ ನೀಡಿದ ಕಾರ್ಬೆಟ್‌ ರಾತ್ರಿ ಆ ಮನೆಯಲ್ಲಿ ಉಳಿದುಕೊಂಡು ಚಿರತೆಯ ಬೇಟೆಗಾಗಿ ಕಾದು ಕುಳಿತರೂ ಪ್ರಯೋಜನವಾಗಲಿಲ್ಲ. ಎರಡು ದಿನ ಹಳ್ಳಿಯಲ್ಲಿದ್ದು ಬೇಟೆಯಾಡದೇ ಬರಿಗೈಲಿ ವಾಪಸ್ ನೈನಿತಾಲ್‌ಗೆ ಬಂದ ಕಾರ್ಬೆಟ್‌ ಮರುದಿನ ಮೊಕಮೆಘಾಟ್‌ಗೆ ತೆರಳಿದ.

ಆದರೆ, ಡಿಸಂಬರ್ ತಿಂಗಳಿನ ಕ್ರಿಸ್‌ಮಸ್ ರಜೆಗೆ ನೈನಿತಾಲ್‌ನ ತನ್ನ ಮನೆಗೆ ಬಂದ ಸಂದರ್ಭದಲ್ಲಿ ಸೊನೌಲಿ ಎಂಬ ಹಳ್ಳಿಯಲ್ಲಿ ಕಾಣಿಸಿಕೊಂಡ ನರಭಕ್ಷಕ ಚಿರತೆಯೊಂದನ್ನು ಬೇಟೆಯಾಡಿ ಹಳ್ಳಿಯ ಜನರನ್ನು ಪ್ರಾಣಾಪಾಯದಿಂದ ಕಾಪಾಡಿದ. ಚಿರತೆ ಹಳ್ಳಿಗೆ ಬರುತಿದ್ದ ದಾರಿಯಲ್ಲಿ ರಾತ್ರಿ ವೇಳೆ ಮೇಕೆಯೊಂದನ್ನು ಕಟ್ಟಿ ಅದರ ಮೂಲಕ ಚಿರತೆಯನ್ನ ಆಕರ್ಷಿಸಿ ಒಂದೇ ರಾತ್ರಿಯಲ್ಲಿ ನರಭಕ್ಷಕನನ್ನು ಕಾರ್ಬೆಟ್‌ ಬೇಟೆಯಾಡಿದ. ಈ ಎಲ್ಲಾ ಘಟನೆಗಳಿಂದ 1907 ರಿಂದ 1910ರವರೆಗೆ ಉತ್ತರ ಹಿಮಾಲಯದಲ್ಲಿ ಜನಸಾಮಾನ್ಯರ ಪಾಲಿಗೆ ದುಸ್ವಪ್ನವಾಗಿದ್ದ  ನರಭಕ್ಷಕ ಹುಲಿ ಮತ್ತು ಚಿರತೆಗಳನ್ನು ಬೇಟೆಯಾಡಿದ ಕೀರ್ತಿ ಕಾರ್ಬೆಟ್‌ಗೆ ಸಲ್ಲಿತು. ಜಿಮ್ ಕಾರ್ಬೆಟ್‌ನ ಈ ಮಾನವೀಯ ಗುಣದ ಸೇವೆಯಿಂದಾಗಿ ಅಂದು ಭಾರತದಲ್ಲಿದ್ದ ಬ್ರಿಟಿಷ್ ಸರ್ಕಾರ ಅವನನ್ನು ವಿಶೇಷ ಗಣ್ಯ ವ್ಯಕ್ತಿ ಎಂದು ಪರಿಗಣಿಸಿ ಗೌರವಿಸತೊಡಗಿತು. ಈ ಕಾರಣಕ್ಕಾಗಿ ಬೇಸಿಗೆಯ ದಿನಗಳಲ್ಲಿ ಮಸ್ಸೂರಿ ಅಥವಾ ನೈನಿತಾಲ್‌ಗೆ ಭೇಟಿ ನೀಡುತಿದ್ದ ವೈಸ್ರಾಯ್ ಮತ್ತು ಅವರ ಕುಟುಂಬ ಕಾರ್ಬೆಟ್‌‌ನ ಅತಿಥಿಗಳಾಗಿ ಅವನ ಮನೆಯಲ್ಲಿ ಉಳಿದುಕೊಳ್ಳುತಿದ್ದರು.

ಸೋಜಿಗದ ಸಂಗತಿಯೆಂದರೆ, ಇವತ್ತಿಗೂ ನೈನಿತಾಲ್ ಗಿರಿಧಾಮದ ಅಂಚಿನಲ್ಲಿರುವ ಹಳ್ಳಿಗಳಲ್ಲಿ ಒಂದು ನಂಬಿಕೆಯಿದೆ. ಅಲ್ಲಿ ಕಾಡುದಾರಿಯಲ್ಲಿ ಪುಟ್ಟದಾದ ಹನುಮಾನ್ ದೇವಾಲಯಗಳಿವೆ. ಜೊತೆಗೆ ಕೆಲವು ದೇವಸ್ಥಾನಗಳಲ್ಲಿ ಜಿಮ್ ಕಾರ್ಬೆಟ್‌ನ ಕಪ್ಪು ಬಿಳುಪಿನ ಫೋಟೊಗಳಿವೆ. ಕಾಡುಪ್ರಾಣಿಗಳಿಂದ ಹನುಮಾನ್  ಮತ್ತು ಕಾರ್ಪೆಟ್ (ಕಾರ್ಬೆಟ್‌) ಸಾಹೇಬ್ ನಮ್ಮನ್ನು ರಕ್ಷಿಸಿಸುತಿದ್ದಾರೆ ಎಂದು ಅಲ್ಲಿನ ಜನ ನಂಬಿಕೊಂಡಿರುವುದನ್ನು ಈಗಲೂ ನಾವು ಕಾಣಬಹುದು.

(ಮುಂದುವರಿಯುವುದು)