ಆಲ್ಫ್ಸ್ ಪರ್ವತ… ಕೊಲರ್ಯಾಡೊ ನದಿ..

ಈ ಬೆಳವಣಿಗೆಗಳ ನಡುವೆಯೂ ಖಂಡಗಳ ಅಲೆತ-ಘರ್ಷಣೆ ನಿಂತಿರಲಿಲ್ಲ. ಈ ಅಲೆತದ ಜೊತೆಗೆ ಸವಕಳಿ ಭೂಮಿಯ ಮೇಲೆ ವಿಚಿತ್ರವೂ, ವಿಶಿಷ್ಟವೂ ಆದ ಭೂರಚನೆಗೆ ಕಾರಣವಾಯಿತು.

ಸ್ವಿಟ್ಜರ್ಲ್ಯಾಂಡಿನ ಆಲ್ಫ್ಸ್ ಪರ್ವತ ಶ್ರೇಣಿ ರಚನೆಯಾದ ರೀತು ಅಚ್ಚರಿಯಾಗುತ್ತದೆ. ನಾವು ಇಲ್ಲಿಯವರೆಗೆ ನೋಡುತ್ತಾ ಬಂದಂತೆ ಈ ಪರ್ವತ ಜ್ವಾಲಾಮುಖಿ ಪರ್ವತವಲ್ಲ. ಸಮುದ್ರ ಮಟ್ಟದಿಂದ ಸುಮಾರು 3 ಮೈಲಿ ಎತ್ತರಕ್ಕಿದೆ. ಇಷ್ಟು ಎತ್ತರದ ಈ ಪರ್ವತದ ರಚನೆ ಹೇಗಾಯಿತು ಎನ್ನುವುದು ಅಚ್ಚರಿ…

ವಿಜ್ಞಾನಿಗಳ ಸಂಶೋಧನೆಯ ಪ್ರಕಾರ ಈ ಎತ್ತರಕ್ಕೆ ಖಂಡಗಳೆರಡರ ಘರ್ಷಣೆಯೇ ಕಾರಣ. ಆಪ್ರಿಕಾ ಮತ್ತು ಯೂರೋಪ್ ಖಂಡಗಳೆರಡು ಡಿಕ್ಕಿ ಹೊಡೆದು ಈ ಪರ್ವತ ರಚನೆ ಆಯಿತು ಎನ್ನುತ್ತಾರೆ ವಿಜ್ಞಾನಿಗಳು.

ಈ ಪ್ರತಿಪಾದನೆಯನ್ನು ಸ್ಪಷ್ಟವಾಗಿ ಅರ್ಥಮಾಡಿಕೊಳ್ಳುವುದಕ್ಕೆ ಈ ಪರ್ವತ ಶ್ರೇಣಿಯ ಮ್ಯಾಟ್ ಹಾರ್ನ್ ಪರ್ವತವೇ ಸಾಕು. ಎರಡು ಖಂಡಗಳಿಂದಾದ ಪರ್ವತ ಇದು. ಪರ್ವತದ ತಳಭಾಗವು ಯೂರೋಪಿನದ್ದಾಗಿದ್ದರೆ, ತುದಿ ಆಫ್ರಿಕಾಕ್ಕೆ ಸೇರಿದ್ದು. ಹೇಗೆ?

ಆಫ್ರಿಕಾ ಮತ್ತು ಯೂರೋಪ್ ಖಂಡಗಳು ಚಲಿಸುತ್ತಾ ಒಂದಕ್ಕೊಂದು ಸಮೀಪಿಸಿ ನಂತರ ಒಂದರಮೇಲೊಂದು ಸೇರಿಕೊಂಡವು. ಈ ಚಲನೆ ನಿಲ್ಲುವ ಹೊತ್ತಿಗೆ ಪರ್ವತಾಕಾರ ಪಡೆದಿತ್ತು, ಎನ್ನುವುದು ವಿಜ್ಞಾನಿಗಳ ಮಾತು.

ಹೀಗೆ ಖಂಡಗಳ ಅಲೆತ ಮತ್ತು ಘರ್ಷಣೆ 45 ದಶಲಕ್ಷ ವರ್ಷಗಳ ಕಾಲ ನಡೆಯುತ್ತಲೇ ಇತ್ತು. ಈ ಚಟುವಟಿಕೆಗಳಿಂದ ಪರ್ವತ ಮತ್ತು ಪರ್ವತಶ್ರೇಣಿಗಳು ರಚನೆಯಾಗುತ್ತಲೇ ಇದ್ದವು. ಆದರೆ ಸವಕಳಿ ಈ ಪರ್ವತಗಳು ಎತ್ತರಕ್ಕೆ ಬೆಳೆಯದಂತೆ ತಡೆಯಿತು.

ಮಂಜು, ಗಾಳಿ, ನೀರಿನಿಂದ ಪರ್ವತಗಳ ಸವಕಳಿ ಪ್ರಕ್ರಿಯೆ ನಡೆದೇ ಇತ್ತು. ವರ್ಷಕ್ಕೆ 50 ದಶಲಕ್ಷ ಟನ್‌ನಷ್ಟು ಮಣ್ಣು ಸವೆಯುತ್ತಿತ್ತು. ಖಂಡಗಳ ಚಲನೆಯಿಂದ ಪರ್ವತ ನಿರ್ಮಾಣವಾಗುತ್ತಿದ್ದರೆ ಸವಕಳಿ ಅದರ ಎತ್ತರವನ್ನು ನಿರ್ಧರಿಸುತ್ತಿತ್ತು.

ಖಂಡಗಳ ಚಲನೆ ಕೇವಲ ಪರ್ವತಗಳನ್ನು ಮಾತ್ರ ನಿರ್ಮಿಸಲಿಲ್ಲ ಎನ್ನುವುದು ಗಮನಿಸಬೇಕಾದ ಮತ್ತೊಂದು ಅಂಶ. ಕೆಲವು ಸಂದರ್ಭಗಳಲ್ಲಿ ಈ ಚಟುವಟಿಕೆಗಳು ಗ್ರ್ಯಾಂಡ್ ಕ್ಯಾನ್ಯನ್ಯ್‌ನಂತಹ ರುದ್ರರಮಣೀಯ ಪರಿಸರವನ್ನೂ ಸೃಷ್ಟಿಸಿದವು.

1 ಮೈಲಿ ಆಳ, 10 ಮೈಲಿ ಅಗಲದ ಕ್ಯಾನ್ಯನ್ ಕೊಲರ‍್ಯಾಡೊ ನದಿಯ ಹರಿಯುವಿಕೆ ಮತ್ತು ಭೂಖಂಡದ ಚಲನೆಯಿಂದಾಗಿ ರೂಪುಗೊಂಡಿದ್ದು. ಸಮುದ್ರ ಮಟ್ಟದಿಂದ 8000 ಅಡಿ ಎತ್ತರದಲ್ಲಿ ಹರಿಯುವ ಕೊಲರ‍್ಯಾಡೊ ನದಿ ಸಣ್ಣದಾಗಿ ಹರಿಯುತ್ತಿದ್ದರೂ ಅದರ ವೇಗ ಹೆಚ್ಚು. ಹಾಗಾಗಿ ಖಂಡಗಳ ಚಲನೆಗೆ ಕೈಜೋಡಿಸಿದಂತೆ ಕೊಲರ‍್ಯಾಡೊ ಭೂಮಿಯನ್ನು ಬೇರ್ಪಡಿಸಿ ಕಣಿವೆಯನ್ನೇ ಸೃಷ್ಟಿಸಿದೆ.

20 ಲಕ್ಷ ವರ್ಷಗಳು. ಮನುಷ್ಯನ ಪೂರ್ವಜರು ಆಫ್ರಿಕಾದಿಂದ ಭೂಮಿಯ ವಿವಿಧ ಭಾಗಗಳತ್ತ ಹೆಜ್ಜೆ ಹಾಕಿದರು. ಈ ಹೊತ್ತಿಗೆ ಭೂಮಿಯನ್ನು ಹಿಮ ಆವರಿಸಿಕೊಳ್ಳಲಾರಂಭಿಸಿತ್ತು. ಅಂದರೆ ಐಸ್‍ಏಜ್ ಆರಂಭವಾಗಿತ್ತು. ಭೂಮಿ ಮತ್ತೆ ಹಿಮಗೋಳವಾಗಿತ್ತು.

ಇಂತಹದೊಂದು ಕಾಲಘಟ್ಟವನ್ನು ಭೂಮಿ ಕಂಡಿತ್ತು ಎಂದು ಗೊತ್ತಾಗಿದ್ದು ಸ್ವಿಟ್ಜರ್‌ಲೆಂಡಿನ ವಿಜ್ಞಾನಿ ಲೂಯಿ ಅಗಸಿಸ್‍ರಿಂದ.

ಆಲ್ಫ್ಸ್ ಪರ್ವತಗಳಲ್ಲಿ ಭಿನ್ನರೀತಿಯ ಶಿಲೆಗಳನ್ನು ನೋಡಿದ್ದ ಅಗಸಿಸ್ ಅಂತಹ ಶಿಲೆಗಳ ರಚನೆಗೆ ಕಾರಣ ಹುಡುಕಾಡಿದರು. ಹಿಮದ ಶೇಖರಣೆ, ಸರಿದಾಟ, ಇಂತಹ ಶಿಲೆಗಳನ್ನು ರಚಿಸಿದ್ದು ಎಂಬ ಅಂಶ ತಿಳಿದುಬಂತು. ಇದು ಭೂಮಿಯ ಐಸ್‍ಏಜ್ ಕುರಿತ ಸಿದ್ಧಾಂತಕ್ಕೆ ಕಾರಣವಾಯಿತು.

ಐಸ್‍ಏಜ್ ಅನ್ನೋದು ಕಟ್ಟುಕತೆ ಎಂದು ಹಲವರು ಜರೆದರು. ಆದರೆ ಐಸ್‍ಏಜ್ ಸಿದ್ಧಾಂತಕ್ಕೆ ಪೂರಕವಾಗಿ ಜಗತ್ತಿನ ಹಲವೆಡೆ ಪುರಾವೆ ಸಿಕ್ಕವು. ನ್ಯೂಯಾರ್ಕಿನ ಸೆಂಟ್ರಲ್ ಪಾರ್ಕ್‍ನಲ್ಲಿರುವ ಬಂಡೆ ಅಂತಹ ಪುರಾವೆಗಳಲ್ಲಿ ಒಂದು. ಹಿಮಯುಗದ (ಐಸ್‍ಏಜ್‍ನ) ಸಮಯದಲ್ಲಿ ಅಮೆರಿಕದ ಈಗಿನ ಅತಿ ಎತ್ತರದ ಕಟ್ಟಡ ಎಂಪೈರ್ ಸ್ಟೇಟ್‍ನ ಎರಡು ಪಟ್ಟು ಎತ್ತರಕ್ಕೆ ಹಿಮ ಈ ನಗರವನ್ನು ಆವರಿಸಿಕೊಂಡಿತ್ತೆಂದು ವಿಜ್ಞಾನಿಗಳು ಪ್ರತಿಪಾದಿಸಿದರು.

ವಾತಾವರಣದಲ್ಲಿ ಆದ ಭಾರೀ ಬದಲಾವಣೆಗಳಿಂದ ಕಾಲಾನಂತರದಲ್ಲಿ ಹಿಮ ಕರಗಿ ಸರೋವರಗಳಾದವು. ಭೂಮಿ ತನ್ನ ವಿಕಾಸದ ಹೆಜ್ಜೆಗಳನ್ನು ಮುಂದುವರೆಸಿತು.

ಮಾನವ ಹೆಜ್ಜೆಗಳು

10000 ವರ್ಷಗಳು. ಇಲ್ಲಿಂದ ಮನುಷ್ಯನ ಇತಿಹಾಸ ಆರಂಭ. ಈ ಅವಧಿಯಲ್ಲಿ ಮನುಷ್ಯನ ವಿಕಾಸದ ಹಾದಿ ಅತಿವೇಗದಲ್ಲಿ ಸಾಗಿ ಅವನು ಬೇರೆಲ್ಲ ಜೀವಿಗಳಿಗಿಂತ ಹೆಚ್ಚು ಪ್ರಾಬಲ್ಯವನ್ನು ಸಾಧಿಸಿದ್ದಾನೆ. ತಾನೇ ಕಂಡುಕೊಂಡ ತಂತ್ರಜ್ಞಾನ ಭೂಮಿಯನ್ನಷ್ಟೇ ಅಲ ಭಾನಿಗೂ ಚಾಚಿಕೊಂಡಿದೆ.

ಆದರೆ ಭೂಮಿಯ 4.5 ಶತಕೋಟಿ ವರ್ಷಗಳ ಅಸಾಧಾರಣ ಪಯಣವನ್ನು ನೋಡಿದರೆ ವಿಜ್ಞಾನಿಗಳು 15000 ವರ್ಷಗಳಲ್ಲಿ ಮತ್ತೊಂದು ಐಸ್‍ಏಜ್ ಬರಬಹುದು. ಮತ್ತೆ ಖಂಡಗಳು ಚಲಿಸಿ ಮುಂದೊಂದು ದಿನ ಈಗ ಇರುವ ಭೂಖಂಡಗಳೇ ಇಲ್ಲವಾಗಬಹುದು. ಇನ್ನು 3 ಶತಕೋಟಿ ವರ್ಷಗಳ ಹೊತ್ತಿಗೆ ಭೂಮಿ ಮಂಗಳನಂತೆ ಬಂಜರಾಗಬಹುದು ಎಂದು ಲೆಕ್ಕ ಹಾಕುತ್ತಾರೆ.

4.5 ಶತಕೋಟಿ ವರ್ಷಗಳಲ್ಲಿ ಆಗಿರುವ ಬದಲಾವಣೆಗಳನ್ನು ನೋಡುತ್ತಾ ಇದ್ದರೆ ವಿಜ್ಞಾನಿಗಳ ಈ ಲೆಕ್ಕಾಚಾರ ತಪ್ಪಾಗಬಹುದು ಎನ್ನಿಸೋದಿಲ್ಲ. ಆದರೆ ಮನುಷ್ಯನಲ್ಲಿರುವ ತಂತ್ರಜ್ಞಾನ ಮತ್ತೊಂದು ಭೂಮಿ ಹುಡುಕಬಹುದು. ಅಲ್ಲಿ ಹೊಸ ಬದುಕನ್ನು ಕಟ್ಟಿಕೊಳ್ಳಬಹುದು. ಆದರೆ ಇದೆಲ್ಲ ನಡೆಯುವ ಸಹಸ್ರಸಹಸ್ರ ವರ್ಷಗಳ ಕಾಲಕ್ಕೆ ನಾವಿರ್ತೀವಾ?

(ಮುಗಿಯಿತು)

ಭೂಮಿ ಹುಟ್ಟಿದ್ದು ಹೇಗೆ? ವಿಡಿಯೊ ಡಾಕ್ಯುಮೆಂಟರಿ: