Follow

Share

– ಸದಾನಂದ ಲಕ್ಷ್ಮೀಪುರ

“ಇಂದು ದೇಶದಲ್ಲಿ ಹಿಂದೂಗಳ ಸಂಖ್ಯೆ ಕಡಿಮೆಯಾಗುತ್ತಿದೆ. ಅದಕ್ಕಿರುವ ಪರಿಹಾರ ಒಂದೇ. ನಮ್ಮ ಎಲ್ಲಾ ಹಿಂದು ಯುವಕರು ಮನಸ್ಸು ಮಾಡಬೇಕು. ಕನಿಷ್ಟ ಮೂರು ಮಕ್ಕಳನ್ನು ಪಡೆಯಬೇಕು. ಎಲ್ಲಿ ಕೈ ಎತ್ತಿ..ನಿಮ್ಮಲ್ಲಿ ಎಷ್ಟು ಜನ ನನ್ನ ಮಾತಿನಂತೆ ನಡೆದುಕೊಳ್ಳುತ್ತೀರಿ..” ಎಂದು ಕಲ್ಲಡ್ಕ ಪ್ರಭಾಕರ ಭಟ್ ಕೇಳುತ್ತಿದ್ದರೆ, ಧರ್ಮದ ಅಮಲಿನದ್ದ ಅನೇಕರು ಹಾಗೂ ಧರ್ಮದ ಜೊತೆಗೆ ಮದ್ಯದ ಮತ್ತಿನೊಂದಿಗೆ ಅಲ್ಲಿ ಹಾಜರಿದ್ದ ಕೆಲವರು ಕೈ ಎತ್ತಿ, ಓ… ಎಂದು ಕೂಗಿ ಸಮ್ಮತಿ ಸೂಚಿಸಿದರು.

ಆ ಕಾರ್ಯಕ್ರಮ ನಡೆದದ್ದು ಸ್ವಾತಂತ್ರೋತ್ಸವ ಹಿಂದಿನ ದಿನ ಮಧ್ಯರಾತ್ರಿ. ಆ ಕಾರ್ಯಕ್ರಮದಲ್ಲಿ ಹಾಜರಿದ್ದವರೆಲ್ಲರೂ ಯುವಕರೇ. ಕೋಮುವಾದಿ ವ್ಯಕ್ತಿಯೊಬ್ಬನ ಮಾತಿಗೆ ಮಾರುಹೋಗಿ ಕೈ ಎತ್ತುವ ಮುನ್ನ, ಇಂತಹದೊಂದು ಸಂಗತಿಗೆ ತನ್ನ ಸಂಗಾತಿಯ ಸಮ್ಮತಿಯೂ ಅಗತ್ಯ ಎಂಬ ಕನಿಷ್ಟ ಪ್ರಜ್ಞೆ ಇದ್ದಿದ್ದರೆ, ಅಲ್ಲಿ ಕೈ ಎತ್ತಿ ಠೇಂಕರಿಸುತ್ತಿರಲಿಲ್ಲ. Of course, ಆ ಭಾಷಣಕಾರ ಪ್ರತಿನಿಧಿಸುವ ಸಂಸ್ಥೆಗಾಗಲಿ, ಈ ಹುಡುಗರ ತಲೆತುಂಬಿಕೊಂಡಿರುವ ಆಲೋಚನೆಗಳಲ್ಲಾಗಲಿ ಮಹಿಳೆಗೆ ಸ್ವತಂತ್ರ ಆಲೋಚನೆಗಳಿರುತ್ತವೆ, ಕೇಳಿಸಿಕೊಳ್ಳಬೇಕು, ಗೌರವಿಸಬೇಕು ಎಂಬ ತಿಳವಳಿಕೆ ಇದ್ದರೆ ತಾನೆ?

ಬರೋಬ್ಬರಿ ಒಂದು ಗಂಟೆ ಮೇಲೆ ಎಂಟು ನಿಮಿಷ ಮಾತನಾಡಿದ ಕಲ್ಲಡ್ಕ ಪ್ರಭಾಕರ ಭಟ್, ತನ್ನ ಭಾಷಣದುದ್ದಕ್ಕೂ ಕೆಂಡಕಾರಿದ್ದು ಸ್ವಾತಂತ್ರ್ಯ ಚಳುವಳಿಯಲ್ಲಿ ಪಾಲ್ಗೊಂಡಿದ್ದ ಕಾಂಗ್ರೆಸ್ ನಾಯಕರ ವಿರುದ್ಧ ಹಾಗೂ ಮುಸಲ್ಮಾನರ ವಿರುದ್ಧ. ಕಾರ್ಯಕ್ರಮದ ಹೆಸರ ಅಖಂಡ ಭಾರತ ಸಂಕಲ್ಪ ದಿನ. ಆದರೆ ಮಾತನಾಡಿದ್ದು ಮಾತ್ರ ಜನರನ್ನು ಧರ್ಮ, ಮತದ ಆಧಾರದ ಮೇಲೆ ಒಡೆಯುವ ಬಗ್ಗೆ. ಅದನ್ನು ವಿಪರ್ಯಾಸ ಅನ್ನಬೇಕೋ, ಮಾತನಾಡುವವರನ್ನು ಹುಚ್ಚರೆನ್ನಬೇಕೋ..ಗೊತ್ತಾಗುತ್ತಿಲ್ಲ. “ಜಗತ್ತಿನಲ್ಲಿ ಧರ್ಮ ಅಂತ ಇರೋದು ಹಿಂದು ಮಾತ್ರ. ಉಳಿದವೆಲ್ಲಾ ಮತಗಳು. ಜಗತ್ತಿನ ಎಲ್ಲರನ್ನೂ ಒಪ್ಪಿಕೊಳ್ಳುವ ಧರ್ಮ ಹಿಂದೂ ಮಾತ್ರ” ಎಂದು ಮಾತನಾಡುತ್ತಲೇ, ಮುಸ್ಲಿಂರ ವಿರುದ್ಧ, ಕ್ರಿಶ್ಚಿಯನ್ನರ ವಿರುದ್ಧ ಕಿಡಿಕಾರುತ್ತಾರೆ. ಇಡೀ ಭೂಮಿಯೇ ಒಂದು ಕುಟುಂಬ ಎಂದು ಹೇಳುವುದಾದರೆ, ಎದುರುಮನೆ ಹುಡುಗ, ಪಕ್ಕದ ಮನೆಯ ಹುಡುಗಿ ಜೊತೆ ಬಸ್ ನಲ್ಲಿ ಪ್ರಯಾಣಿಸಿದರೆ, ಹಿಡಿದು ನಿಲ್ಲಿಸಿ ಹೊಡೆಯುತ್ತಾರೆ. ಇಂತಹ ಮಹಾನ್ ನಾಯಕರು ಅಂತಹ ನಡವಳಿಕೆಗಳನ್ನು ಸಭೆಯಲ್ಲಿ ನಿಂತು ಸಮರ್ಥಿಸಿಕೊಳ್ಳುತ್ತಾರೆ. ಆದರೂ ಮಾತನಾಡುವಾಗ ವಸುದೈವ ಕುಟುಂಬಕಂ! ಕೇಕೆ ಹಾಕುವರಿಗೆ ಇಂತಹ ಸಣ್ಣಪುಟ್ಟ ವೈರುಧ್ಯಗಳು ಅರ್ಥವಾಗುವುದಿಲ್ಲವೆ?

ಈ ಭಟ್ ಮಹಾಶಯ ಹೇಳಿದ ಇನ್ನೊಂದು ಮಾತು – ಲವ್ ಜಿಹಾದ್ ಹೆಸರಿನಲ್ಲಿ ಹಿಂದು ಹೆಣ್ಣು ಮಕ್ಕಳನ್ನು ಒಲಿಸಿಕೊಂಡು ಮದುವೆಯಾಗಿ ಡಜನ್ ಗಟ್ಟಲೆ ಮಕ್ಕಳು ಮಾಡುವುದೇ ಅವರ ಉದ್ದೇಶ. ಈ ಮಾತನ್ನು ಹಲವು ವರ್ಷಗಳಿಂದ ಹೇಳುತ್ತಲೇ ಬಂದಿದ್ದಾರೆ. ಆದರೆ ಇದುವರೆಗೆ ಸಾಬೀತು ಪಡಿಸಲು ಸಾಧ್ಯವಾಗಿಲ್ಲ. ಆದರೂ ಹೇಳುವುದನ್ನು ಬಿಡೋಲ್ಲ. ಅಷ್ಟೇ ಅಲ್ಲ, ಒಂದು ಮಾತು ಮುಂದೆ ಹೋಗಿ, ‘ನೀವು ಹಾಗೆ ಮಾಡುವುದು ಯಾವಾಗ..?’ ಎಂದು ಹಿಂದೂ ಯುವಕರಿಗೆ ಪ್ರಚೋದನೆ ನೀಡುತ್ತಾರೆ.

ಮಹಾತ್ಮ ಗಾಂಧಿ ದೇಶ ಸ್ವಾತಂತ್ರ್ಯ ಪಡೆದ ನಂತರ ದೇಶದಲ್ಲಿ ರಾಮರಾಜ್ಯ ಸ್ಥಾಪನೆಯಾಗಬೇಕೆಂದು ಬಯಸಿದ್ದರಂತೆ. ಅದು ಆಗಲಿಲ್ಲ. ರಾಮರಾಜ್ಯದ ಬದಲು, ಸಂವಿಧಾನ ಬದ್ಧ ಪ್ರಜಾರಾಜ್ಯ ಬಂದದ್ದು ಇಡೀ ದೇಶದ ಅಭಿವೃದ್ಧಿಗೆ ತೊಡಕಂತೆ. ಇಂತಹ ಜನವಿರೋಧಿ ಮಾತುಗಳಿಗೂ ಚಪ್ಪಾಳೆ ಹಾಕುವವರಿದ್ದಾರಲ್ಲ ಎಂಬುದೇ ಆಘಾತಕಾರಿ. ಯಾವುದೇ ರಾಜ ಆಗಲಿ, ಅಲ್ಲಿ ಅಧಿಕಾರ ತಂದೆಯಿಂದ ಮಕ್ಕಳಿಗೆ ರವಾನೆಯಾಗುತ್ತದೆ. ರಾಮ ಆದರೂ ಅಷ್ಟೆ, ಕೃಷ್ಣ ಆದರೂ ಅಷ್ಟೆ. ಬಡವನಿಗೆ, ನಿರ್ಗತಿಕನಿಗೆ ತನ್ನ ಆಳುವವರನ್ನು ಆಯ್ಕೆ ಮಾಡಿಕೊಳ್ಳುವ ಸ್ವಾತಂತ್ರ್ಯ ಇರಲು ಸಾಧ್ಯವೇ? ಹೀಗೆ ಸ್ವಾತಂತ್ರ್ಯದ ಮೂಲ ತತ್ತ್ವಕ್ಕೆ ವಿರುದ್ಧವಾಗಿ ಮಾತನಾಡುವವರಿಗೆ ಚಪ್ಪಾಳೆ ಹಾಕುವುದೆಂದರೆ, ನಮ್ಮ ಅಸ್ಥಿತ್ವವನ್ನು ಕಡೆಗಣಿಸಿದಂತೆ.

ಸ್ವತಂತ್ರ ಆಲೋಚನೆಯಿಂದ ತಪ್ಪು-ಸರಿಗಳ ವ್ಯತ್ಯಾಸ ಅರಿಯಲು ಶಿಕ್ಷಣ ಅಗತ್ಯ. ಆದರೆ ಸೋಕಾಲ್ಡ್ ‘ಶಿಕ್ಷಿತ’ ರೇ ಚಪ್ಪಾಳೆ ಹೊಡೆವರಲ್ಲಿ, ಮೂರು ಮಕ್ಕಳನ್ನು ಮಾಡಿಕೊಳ್ಳಲು ಸಮ್ಮತಿ ಸೂಚಿಸಿದವರಲ್ಲಿ ಅನೇಕರಿದ್ದರು.

Follow

Share

– ಸದಾನಂದ ಲಕ್ಷ್ಮೀಪುರ

ಹಾಸನದಲ್ಲಿ ರೈತಪರ ಹೋರಾಟಗಾರರ ಬಂಧನ:

ಅಡವಿ ಬಂಟೇನಹಳ್ಳಿ ಹಾಸನ ತಾಲೂಕಿನ ಗ್ರಾಮ. ಹೆಸರೇ ಹೇಳುವಂತೆ ಅಡವಿಯೇ ಆ ಊರು. ಹತ್ತಾರು ಊರುಗಳಿಂದ ಐವತ್ತು ವರ್ಷಗಳ ಹಿಂದೆ ಇಲ್ಲಿಗೆ ಬಂದ ಭೂರಹಿತ ಕೃಷಿ ಕಾರ್ಮಿಕರು ಕಟ್ಟಿಕೊಂಡ ಊರದು. ಸೀಗೆಗುಡ್ಡ ಎಂಬ ಎತ್ತರದ ಪ್ರದೇಶದ ಸುತ್ತಲಲ್ಲಿರುವ ಭೂಮಿಯನ್ನು ಸಮತಟ್ಟು ಮಾಡಿಕೊಂಡು ಬಹಳ ಕಾಲದಿಂದ ಕೃಷಿ ಮಾಡುತ್ತಿದ್ದಾರೆ. ಅವರಲ್ಲಿ ಕೆಲವರು ಕರ್ನಾಟಕ ಭೂ ಸುಧಾರಣೆ ಕಾಯಿದೆಯಡಿ ಅದೇ ಭೂಮಿಯ ಮಂಜೂರಿಗಾಗಿ ಅರ್ಜಿ ಹಾಕಿದ್ದಾರೆ. ಬೆರಳೆಣಿಕೆಯಷ್ಟು ಜನರಿಗೆ ಮಂಜೂರೂ ಆಗಿದೆ, ಮತ್ತೆ ಕೆಲವರ ಅರ್ಜಿಗಳು ಇತ್ಯರ್ಥವಾಗದೆ ಬಾಕಿ ಉಳಿದಿವೆ.

ಈಗ್ಗೆ ನಾಲ್ಕು ದಿನಗಳ ಹಿಂದೆ (ದಿನಾಂಕ ಫೆ.12) ಅರಣ್ಯ ಇಲಾಖೆಯ ಸಿಬ್ಬಂದಿ ಆ ಭೂ ಪ್ರದೇಶ ಕಾಯ್ದಿಟ್ಟ ಅರಣ್ಯ ಎಂದು ತಮ್ಮ ವಶಕ್ಕೆ ತೆಗೆದುಕೊಳ್ಳಲು ಮುಂದಾದರು. ಒಂದು ದಿನದ ಮಟ್ಟಿಗೆ ಅವರ ಕಾರ್ಯಾಚರಣೆ ಯಾವುದೇ ಅಡೆತಡೆ ಇಲ್ಲದೆ ನಡೆಯಿತು. ಮಾರನೆಯ ದಿನವೂ ಅವರು ಕಾರ್ಯಾಚರಣೆ ಮುಂದುವರಿಸಿದರು. ಆ ಹೊತ್ತಿಗೆ ರೈತರು ಸಂಘಟಿತರಾಗಿದ್ದರು. ಕರ್ನಾಟಕ ಪ್ರಾಂತ ರೈತ ಸಂಘದ ಎಚ್.ಆರ್.ನವೀನ್ ಕುಮಾರ್, ಎಂ.ಜಿ. ಪೃಥ್ವಿ, ರಾಘವೇಂದ್ರ ಮತ್ತಿತರರ ನೇತೃತ್ವದಲ್ಲಿ ಸೀಗೆಗುಡ್ಡದ ತಪ್ಪಲಲ್ಲಿ ಧರಣಿ ಕೂತರು. ಅರಣ್ಯಾಧಿಕಾರಿಗಳು ತಮ್ಮ ಕಾರ್ಯ ಮುಂದುವರಿಸಲಾಗದೆ, ಪೊಲೀಸರನ್ನು ಕರೆಸಿದರು. ಪೊಲೀಸ್ ಮೀಸಲು ಪಡೆ ಸ್ಥಳಕ್ಕೆ ಧಾವಿಸಿತು. ರೈತರು ಜೆಸಿಬಿಗಳನ್ನು ನಿಲ್ಲಿಸಿ ಪ್ರತಿಭಟನೆ ಮಾಡಿದರು.

ಕಳೆದ 50 ವರ್ಷಗಳಿಂದ ಉಳುಮೆ ಮಾಡಿಕೊಂಡು ಬಂದಿದ್ದೇವೆ. ಹೀಗೆ ಏಕಾಏಕಿ ನುಗ್ಗಿ ಎತ್ತಂಗಡಿ ಮಾಡಿಸುವುದೆಂದರೆ ಹೇಗೆ, ಎನ್ನುವುದು ಅವರ ವಾದ. ಅಷ್ಟಲ್ಲದೆ ತೆಂಗಿನ ತೋಟದ ಮಧ್ಯೆ ಜೆಸಿಬಿ ಸಹಾಯದಿಂದ ಗುಂಡಿ ತೋಡಿ ರೈತನ ಆಕ್ರೋಷಕ್ಕೆ ಕಿಡಿ ಹತ್ತಿಸಿದರು.

ಅಧಿಕಾರಿಗಳು ತಮ್ಮ ಕಾರ್ಯಾಚರಣೆಗೂ ಮುನ್ನ ಯಾರಿಗೂ ನೊಟೀಸ್ ನೀಡಿಲ್ಲ. ಕೇಳಿದರೆ, ನೊಟೀಸ್ ನೀಡುವ ಪ್ರಮೇಯವೇ ಸೃಷ್ಟಿಯಾಗುವುದಿಲ್ಲ, ಏಕೆಂದರೆ ಇದು ಅರಣ್ಯ ಭೂಮಿ. 1940 ರಷ್ಟು ಹಿಂದೆಯೇ ಕಾಯ್ದಿಟ್ಟ ಅರಣ್ಯ ಎಂದು ಘೋಷಿಸಿಯಾಗಿದೆ. ಮುಲಾಜಿಲ್ಲದೆ ಎತ್ತಂಗಡಿ ಮಾಡಿಸದೇ ಬೇರೆ ದಾರಿ ಇಲ್ಲ ಎನ್ನುವುದು ಅಧಿಕಾರಿಗಳ ವಾದ. ಆದರೆ ಮಂಜೂರಾದ ಬಗ್ಗೆ ಕೆಲವರ ಬಳಿ ದಾಖಲೆಗಳಿವೆ. ಅವುಗಳನ್ನು ಪರಿಶೀಲಿಸಿ. ಮೇಲಾಗಿ ಸರಕಾರದ ನೇತಾರರು ಆಗಾಗ ಹೇಳುತ್ತಾ ಬಂದಿರುವುದೆಂದರೆ, ಐದು ಎಕರೆಗಿಂತ ಕಡಿಮೆ ಕಂದಾಯ ಭೂಮಿ ಒತ್ತುವರಿ ಮಾಡಿರುವವರನ್ನು ಹಾಗೂ ಮೂರು ಎಕರೆಗಿಂತ ಕಡಿಮೆ ಅರಣ್ಯ ಭೂಮಿ ಒತ್ತುವರಿ ಮಾಡಿರುವವರನ್ನು ಒತ್ತುವರಿ ತೆರವು ಕಾರ್ಯಾಚರಣೆಯಿಂದ ಕೈ ಬಿಡಲಾಗುವುದು. ಇದೇ ಅಭಿಪ್ರಾಯವನ್ನು ಕರ್ನಾಟಕ ಹೈಕೋರ್ಟ್ ಕೂಡ ವ್ಯಕ್ತಪಡಿಸಿದೆ. ಹೀಗಿರುವಾಗ ಒತ್ತುವರಿ ತೆರವು ಮಾಡಬಾರದು ಎನ್ನುವುದು ಪ್ರತಿಭಟನಾಕಾರರ ವಾದ.

ಆರೋಪಗಳು:
ಫೆ.13 ರ ಸಂಜೆ ಹೊತ್ತಿಗೆ ಎಲ್ಲವೂ ಶಾಂತವಾಯ್ತು. ರೈತರ ಬಳಿ ಇರುವ ದಾಖಲೆಯನ್ನು ಪರಿಶೀಲಸಿ ಮುಂದಿನ ಕ್ರಮ ತೆಗೆದುಕೊಳ್ಳುವುದು ಎಂದು ಅಧಿಕಾರಿಗಳು ಹಿಂದೆ ನಡೆದರು. ಕೆಪಿಆರ್‌ಎಸ್ ನೇತಾರರೂ ಹಾಸನಕ್ಕೆ ಹಿಂತಿರುಗಿದರು. ನಗರದ ಸಿಐಟಿಯು ಕಚೇರಿಯಲ್ಲಿ ಪ್ರತಿಭಟನೆಯಲ್ಲಿ ನೇತೃತ್ವ ವಹಿಸಿದ್ದ ನವೀನ್, ಪೃಥ್ವಿ, ರಾಘವೇಂದ್ರ ಇತರರು ಸಭೆ ನಡೆಸುತ್ತಿರುವಾಗ, ಅಂದರೆ ರಾತ್ರಿ 9 ರ ಹೊತ್ತಿಗೆ, ಧಾವಿಸಿದ ಪೊಲೀಸರು ಮೂವರನ್ನೂ ಬಂಧಿಸಿದರು. ಯಾಕೆ…ಏನು? ಎಂದು ವಿಚಾರಿಸಿದರೆ, ಅರಣ್ಯ ಇಲಾಖೆ ಅಧಿಕಾರಿಗಳು ಅವರ ವಿರುದ್ಧ ದೂರು ದಾಖಲಿಸಿದ್ದಾರೆ. ಹಾಗಾಗಿ ಬಂಧನ ಆಗಲೇಬೇಕು ಎನ್ನುವುದು ಪೊಲೀಸರ ವಾದ. ಆ ಹೊತ್ತಿಗೆ ವಿರೂಪಾಕ್ಷ ಎನ್ನುವ ಮತ್ತೋರ್ವ ಪ್ರತಿಭಟನಾಕಾರರನ್ನು ಬಂಧಿಸಿಯಾಗಿತ್ತು.

ಬಂಧನವಾಗಿದ್ದು ಶುಕ್ರವಾರ ರಾತ್ರಿ. ನಂತರ ಶನಿವಾರ ರಜೆ (ಎರಡನೇ ಶನಿವಾರ), ಭಾನುವಾರವೂ ರಜೆ. ಸೋಮವಾರ ಒಂದು ದಿನ ಕೋರ್ಟ್-ಕಚೇರಿಗಳು ತೆರೆದಿರುತ್ತವೆ, ಮತ್ತೆ ಮಂಗಳವಾರ ಶಿವರಾತ್ರಿ ರಜೆ. ಚಳವಳಿಯ ಸಂಗಾತಿಗಳನ್ನು ಜಾಮೀನಿನ ಮೇಲೆ ಬಿಡುಗಡೆ ಮಾಡಿಸಲು ಯಾರಿಗೂ ಕನಿಷ್ಟ ಮೂರ್ನಾಲ್ಕು ದಿನಗಳ ಮಟ್ಟಿಗಾದರೂ ಸಾಧ್ಯವಾಗಬಾರದು ಎನ್ನುವುದು ಪೊಲೀಸರ ಸಂಚು! ಇಲ್ಲವಾದರೆ ಶುಕ್ರವಾರ ರಾತ್ರಿ ಬಂಧಿಸಿ, ಅದೇ ದಿನ ನ್ಯಾಯಾಧೀಶರ ಮುಂದೆ ಹಾಜರುಪಡಿಸಿ ನ್ಯಾಯಾಂಗ ಬಂಧನಕ್ಕೆ ತಳ್ಳುವಂತಹದ್ದೇನಿತ್ತು..? ಮುಖ್ಯವಾಗಿ ಇವರೆಲ್ಲರೂ ಪ್ರತಿದಿನ ಒಂದಲ್ಲ ಒಂದು ಜನಪರ ಹೋರಾಟದಲ್ಲಿ ತೊಡಗಿಸಿಕೊಂಡವರು. ಹಿಂದಿನ ದಿನದ ತನಕವೂ ಅಂಗನವಾಡಿ ನೌಕರರ ಪ್ರತಿಭಟನೆಯಲ್ಲಿ ಸಕ್ರಿಯವಾಗಿ ಪಾಲ್ಗೊಂಡಿದ್ದರು. ಹಾಗೂ ಪೊಲೀಸರ ಬಂಧನಕ್ಕೆ ಹೆದರಿ ತಲೆಮರೆಸಿಕೊಳ್ಳಲು ಅವರೇನು ಕಳ್ಳತನವನ್ನೋ, ಸುಲಿಗೆಯನ್ನೋ ಮಾಡಿರಲಿಲ್ಲವಲ್ಲ. ಹಾಗಿದ್ದೂ ಅವರನ್ನು ರಾತ್ರೋರಾತ್ರಿ ಬಂಧಿಸುವ ತರಾತುರಿ ಪ್ರದರ್ಶನ ಯಾಕೆ..? ಹಾಗೂ ಪೊಲೀಸರು ಇವರ ವಿರುದ್ಧ ದಾಖಲಿಸಿಕೊಂಡಿರುವ ದೂರಿನಲ್ಲಿ ನಮೂದಿಸಿರುವ ಆರೋಪಗಳು ಎಂಥವು ಒಮ್ಮೆ ನೋಡಿ. ಅಕ್ರಮ ಕೂಟ (ಐಪಿಸಿ ಸೆ.143 ), ಗಲಭೆ (147), ಮಾರಕಾಸ್ತ್ರಗಳಿಂದ ಗಲಭೆ (147), ಅಕ್ರಮ ಬಂಧನ (341), ಶಾಂತಿ ಭಂಗಕ್ಕೆ ಪ್ರಚೋದನೆ (504) ಹಾಗೂ ಸರಕಾರಿ ನೌಕರರು ತಮ್ಮ ಕರ್ತವ್ಯ ಮಾಡದಂತೆ ತಡೆ (353).

ಜನಪರ, ರೈತಪರ ಹೋರಾಡುವವರನ್ನು ವ್ಯವಸ್ಥಿತವಾಗಿ ಹತ್ತಿಕ್ಕುವ ಪ್ರಯತ್ನವಿದು. ಸಿದ್ದರಾಮಯ್ಯನವರೇ, ಕೇಳಿಸಿಕೊಳ್ಳಿ ರಾಜ್ಯದ ರೈತರ ಹಿತ ಕಾಯುತ್ತೇನೆಂದು ಅಧಿಕಾರಕ್ಕೆ ಬಂದ ನೀವು, ಆ ಕೆಲಸ ಮರೆತು ನಿದ್ರೆ ಹೋಗಿರುವಾಗ, ಆ ಬಗ್ಗೆ ಹೋರಾಟಕ್ಕೆ ಇಳಿದವರು ಈ ಚಳವಳಿಗಾರರು. ನೀವು ಸಂವಿಧಾನಬದ್ಧವಾಗಿ ಮಾಡಬೇಕಿದ್ದ ಕೆಲಸವನ್ನು ಅವರು ಮಾಡುತ್ತಿದ್ದಾರೆ. ಈ ಮೂವರಲ್ಲಿ ಯಾರಿಗೂ, ಸೀಗೆಗುಡ್ಡದ ಬುಡದಲ್ಲಿ ಒಂದು ಇಂಚಿನಷ್ಟು ಭೂಮಿಯ ಅಗತ್ಯ ಇಲ್ಲ. ಅಂತಹವರನ್ನು ಬಂಧಿಸಿ, ಜೈಲಿಗಟ್ಟಿ ನೀವು ಸಾಧಿಸುವುದೇನು?

ಅಧಿಕಾರಿಗೆ ‘ಕರುಣೆ’:
ಅಷ್ಟಕ್ಕೂ, ಅರಣ್ಯ ಇಲಾಖೆ ಒತ್ತುವರಿ ತೆರವಿಗೆಂದು ಮುಂದಾದ ಭೂಮಿ ದಾಖಲೆ ಪ್ರಕಾರ ‘ಕಾಯ್ದಿಟ್ಟ ಅರಣ್ಯ’. ಅವರು ಕಾಯ್ದಿಟ್ಟು ದಶಕಗಳೇ ಆಗಿ ಹೋಗಿವೆ. ಆದರೆ ಇದುವರೆಗೂ ಅಲ್ಲಿ ಅರಣ್ಯದ ಯಾವ ಲಕ್ಷಣಗಳೂ ಇಲ್ಲ. ದಾಖಲೆಗಳು, ನ್ಯಾಯಾಲಯದ ತೀರ್ಪುಗಳನ್ನು ಒಂದು ಕ್ಷಣ ಆಚೆಗಿಟ್ಟು ಯೋಚಿಸೋಣ. ಸರಕಾರ ಇದುವರೆಗೂ ಕಾಯ್ದಿಟ್ಟ ಪ್ರದೇಶವನ್ನು ಅರಣ್ಯವನ್ನಾಗಿ ಅಭಿವೃದ್ಧಿ ಪಡಿಸಲು ಸಾಧ್ಯವಾಗದ ಮೇಲೆ, ರೈತರು ಅದನ್ನು ಸದುಪಯೋಗ ಪಡಿಸಿಕೊಂಡು ದೇಶಕ್ಕೆ ಅಗತ್ಯವಾದ ಕಾಳು-ಕಡಿ ಬೆಳೆದು ರಾಷ್ಟ್ರದ ಉತ್ಪನ್ನಕ್ಕೆ ಕೊಡುಗೆ ನೀಡಿದರೆ ತಪ್ಪೇನು..? ಆ ಭೂಮಿಯನ್ನು ಹಾಗೆ ಪಾಳು ಬಿಟ್ಟು, ದಾಖಲೆಯಲ್ಲಿ ಕಾಯ್ದಿಟ್ಟ ಅರಣ್ಯ ಎಂದು ತೋರಿಸಿದರೆ, ವಾತಾವರಣದಲ್ಲಿ ಆಮ್ಲಜನಕದ ಉತ್ಪಾದನೆ ಹೆಚ್ಚಾಗುತ್ತದೆಯೆ? ಈ ಭೂಮಿಯನ್ನು ಇದುವರೆಗೆ ಕಾಪಾಡಿಕೊಂಡು ಬಂದಿದ್ದಕ್ಕೆ ರೈತರಿಗೆ ಸರಕಾರ ಮೊದಲು ಧನ್ಯವಾದ ಹೇಳಬೇಕು. ಸರಕಾರದ ಅಧಿಕಾರಕ್ಕೆ ಹತ್ತಿರದಲ್ಲಿರುವ ಯಾರಾದರೂ ಆ ಭೂಮಿಯನ್ನು ಲಪಟಾಯಿಸಿ ಕಾಫಿ ಪ್ಲಾಂಟೇಶನ್ನೋ..ರಿಯಲ್ ಎಸ್ಟೇಟ್ ಆಗಿಯೋ ಪರಿವರ್ತಿಸಿಲ್ಲವಲ್ಲ..ಅದಕ್ಕೆ ಖುಷಿಪಡಿ.

ಇತ್ತೀಚಿನ ವರ್ಷಗಳ ವರೆಗೂ ಉನ್ನತ ಅಧಿಕಾರ ಅನುಭವಿಸಿದ ನಿವೃತ್ತ ಐಎಎಸ್ ಅಧಿಕಾರಿ ಐ.ಎಂ.ವಿಠ್ಠಲಮೂರ್ತಿ ಬೇಲೂರು ತಾಲೂಕಿನಲ್ಲಿ 19 ಎಕರೆ 20 ಗುಂಟೆಯಷ್ಟು ಅರಣ್ಯ ಭೂಮಿಯನ್ನು ಒತ್ತುವರಿ ಮಾಡಿದ್ದಾರೆ. ಅವರ ಪ್ರಕರಣದಲ್ಲಾದರೆ, ಅರಣ್ಯ ಇಲಾಖೆಯವರು ನೊಟೀಸ್ ನೀಡುತ್ತಾರೆ. ಒಂದು ವಾರದೊಳಗೆ ತೆರವು ಮಾಡಬೇಕು ಎಂದು ಹೇಳಿದ ಮೇಲೂ, ನಿವೃತ್ತ ಅಧಿಕಾರಿ ಸುಮ್ಮನಿರುತ್ತಾರೆ. ತಮ್ಮ ವಕೀಲರ ಮೂಲಕ ನೊಟೀಸ್ ಗೆ ಉತ್ತರ ನೀಡುತ್ತಾರೆ. ಆ ನಂತರ ತಿಂಗಳುಗಳೇ ಉರುಳಿದರೂ, ಅಲ್ಲಿ ತೆರವು ಕಾರ್ಯಾಚರಣೆ ಮಾಡಲು ಈ ಸರಕಾರದ ಅಧಿಕಾರಿಗಳು ಮುಂದಾಗುವುದಿಲ್ಲ. ಆದರೆ ಬಡ ರೈತರ ವಿಚಾರ ಬಂದಾಗ ಆ ‘ಕರುಣೆ’ ಇಲ್ಲ.

ಪೊಲೀಸರ ದೌರ್ಜನ್ಯ:
ಈ ಘಟನೆಯಲ್ಲಿ ಪೊಲೀಸರು ತೋರಿದ ವರ್ತನೆ ಚಳವಳಿಕಾರರಲ್ಲಿ ಆಕ್ರೋಷ ಹುಟ್ಟಿಸಿದೆ. ಅವರು ಈ ಹೋರಾಟಗಾರರನ್ನು, ಕೊಲೆ ಆರೋಪಿಗಳಂತೆ ನಡೆಸಿಕೊಂಡಿದ್ದಾರೆ. ಇಲ್ಲವಾದಲ್ಲಿ, ರಾತ್ರೋರಾತ್ರಿ ಬಂಧಿಸಿ, ಮೂರ್ನಾಲ್ಕು ದಿನಗಳ ಮಟ್ಟಿಗೆ ಜೈಲಿನಲ್ಲಿಡಬೇಕೆಂಬ ಯೋಚನೆ ಬಂದದ್ದೇಕೆ? ಇದೇ ಹಾಸನದ ಪೊಲೀಸರ ಮುಂದೆ ಹಲವು ಗಂಭೀರ ಪ್ರಕರಣಗಳು ದಾಖಲಾಗಿವೆ. ಆರೋಪಿಗಳು ಇಡೀ ದಿನ ಇವರ ಮುಂದೆ ಎದೆಯುಬ್ಬಿಸಿಕೊಂಡು ಅಡ್ಡಾಡುತ್ತಿದ್ದರೂ, ಅವರನ್ನು ಬಂಧಿಸುವ ಛಾತಿ ತೋರಿಸದ ಪೊಲೀಸರು, ಚಳವಳಿಕಾರರನ್ನು ಬಂಧಿಸುವ ದಾಷ್ಟ್ಯ ತೋರಿಸಿದ್ದೇಕೆ?

ಹಾಸನದ ಶಾಸಕ ಎಚ್.ಎಸ್. ಪ್ರಕಾಶ್ ಸಹೋದರ ಎಚ್.ಎಸ್.ಅನಿಲ್ ಕುಮಾರ್. ಅವರು ಹಾಸನ ನಗರಸಭೆಯ ಸದಸ್ಯರೂ ಹೌದು. ಅವರ ವಿರುದ್ಧ ನಗರಸಭೆ ಆಯುಕ್ತ ದೂರು ದಾಖಲಿಸಿದ್ದಾರೆ. ನಗರಸಭೆಯ ಇಮೇಲ್ ಅಕೌಂಟನ್ನು ದುರುಪಯೋಗ ಪಡಿಸಿಕೊಂಡು ಸುಳ್ಳು ಮಾಹಿತಿಯನ್ನು ಮಾಧ್ಯಮ ಸಂಸ್ಥೆಗಳೂ ಸೇರಿದಂತೆ, ಹಲವರಿಗೆ ರವಾನಿಸಿದ ಆರೋಪ ಇದೆ. ಪೊಲೀಸರ ಪ್ರಾಥಮಿಕ ತನಿಖೆಯಲ್ಲಿ ಅಂತಹದೊಂದು ಮೇಲ್ ರವಾನೆಯಾಗಿದ್ದು ಆ ಸದಸ್ಯರಿಗ ಸೇರಿರುವ ಶಿಕ್ಷಣ ಸಂಸ್ಥೆಗೆ ಸೇರಿದ್ದ ಇಂಟರ್ನೆಟ್ ಖಾತೆ (ಐಪಿ ವಿಳಾಸ) ಯಿಂದ ಹೋದದ್ದು ಎಂಬುದು ಗೊತ್ತಾಗಿದೆ. ಆದರೆ, ಇದುವರೆಗೂ ಬಂಧನವಿರಲಿ.., ಸಣ್ಣ ಮಟ್ಟದ ಕ್ರಮ ಕೂಡ ಕೈಗೊಂಡಿಲ್ಲ. ನೆನಪಿಸಿಕೊಳ್ಳುತ್ತಾ ಹೋದರೆ, ಪ್ರಭಾವಿಗಳನ್ನು ಬಚಾವು ಮಾಡುವ, ಮಾಡಿದ ಅನೇಕ ಉದಾಹರಣೆಗಳು ಸಿಗುತ್ತವೆ. ಹಾಗಾದರೆ, ಪೊಲೀಸರು ಇರಬೇಕಾದ್ದು ಯಾರ ಪರ..?