Follow– ಭೂಮಿ ಬಾನು
ಇತ್ತೀಚಿನ ರಾಜಕೀಯ ಬೆಳವಣಿಗೆಗಳು ರಾಜ್ಯದಲ್ಲಿ ಅಸ್ತಿತ್ವದಲ್ಲಿರುವುದು ಸಮ್ಮಿಶ್ರ ಸರಕಾರವೇ ಎನ್ನುವ ಸಂಶಯ ಹುಟ್ಟಿಸುತ್ತಿವೆ.ಡಿ.ವಿ ಸದಾನಂದಗೌಡರು ಒಂದು ಬಣದ ಆಯ್ಕೆ. ಶೆಟ್ಟರ್ ಬಣ ಜಗದೀಶ್ ಶೆಟ್ಟರ್ ಉಪ ಮುಖ್ಯಮಂತ್ರಿಯಾಗಬೇಕು ಎಂದು ಪಟ್ಟು ಹಿಡಿಯಿತು. ಜೊತೆಗೆ ಒಂದೊಂದು ಬಣವೂ ತಲಾ 17 ಸಚಿವ ಸ್ಥಾನ ಬೇಕು ಎಂದು ಹಟ ಹಿಡಿಯಿತು.
ಈಗ್ಗೆ ಮೂರು ವರ್ಷಗಳ ಹಿಂದೆ ಜೆಡಿ(ಎಸ್)-ಬಿಜೆಪಿ ಸಮ್ಮಿಶ್ರ ಸರಕಾರ ಆಡಳಿತಕ್ಕೆಬಂದಾಗ ಎರಡು ಪಕ್ಷಗಳ ನಾಯಕರ ಮಧ್ಯೆ ಇಂತಹದೇ ಒಪ್ಪಂದ ಏರ್ಪಟಿತ್ತು. ಆಗಿನ ಸಂದರ್ಭದಲ್ಲಿ ಪಕ್ಷಗಳು ಬೇರೆ ಇದ್ದವು. ಈಗ ಪಕ್ಷ ಒಂದೇ, ಬಣ ಎರಡು. ಆಡಳಿತ ಪಕ್ಷದ ನಾಯಕನನ್ನು ಆಯ್ಕೆ ಮಾಡಲು ‘ಪ್ರಜಾಪ್ರಭುತ್ವ’ ಕ್ರಮ ಅನುಸರಿಸಿದ ಕಾರಣ ಎರಡು ಬಣಗಳ ಬೆಂಬಲಿಗರಾರು ಎನ್ನುವುದ ಜಗಜ್ಜಾಹಿರಾಯಿತು. ಮುಂದಿನ ದಿನಗಳಲ್ಲಿ ಬಣಗಳ ನಡುವಿನ ಭಿನ್ನಮತ ಉಲ್ಬಣಗೊಂಡು ಸರಕಾರ ಮುಗ್ಗರಿಸುವ ಸ್ಥಿತಿ ಬರಬಹುದು ಎನ್ನುವ ಕಾರಣಕ್ಕೆ ಮುಖ್ಯಮಂತ್ರಿ ಸದಾ ಎಚ್ಚರದಿಂದಲೇ ಹೆಜ್ಜೆ ಇಡಬೇಕು. ಈ ಸ್ಥಿತಿಗೆ ಕಾರಣ ಬಿಜೆಪಿ ಹೈಕಮಾಂಡ್.
ಭ್ರಷ್ಟಾಚಾರ ಆರೋಪ ಹೊತ್ತ ಮುಖ್ಯಮಂತ್ರಿಗೆ ರಾಜೀನಾಮೆ ಕೊಡಿ ಎಂದು ಆದೇಶಿಸಿದ ಹೈಕಮಾಂಡ್ ಒಮ್ಮತದ ಅಭ್ಯರ್ಥಿಯನ್ನು ತೆರವಾದ ಸ್ಥಾನಕ್ಕೆ ತರಲು ಸೋತಿತು. ಪರಿಣಾಮವಾಗಿ ಕೇವಲ 62 ಶಾಸಕರ ಬೆಂಬಲವಿರುವ ಅಭ್ಯರ್ಥಿ 224 ಸದಸ್ಯ ಬಲದ ಶಾಸನ ಸಭೆಯ ನಾಯಕನಾಗಬೇಕಾಯಿತು!
No doubt, ಡಿವಿಎಸ್ ಯಡಿಯೂರಪ್ಪನ ಆಯ್ಕೆ. ಆ ಕಾರಣಕ್ಕೇನೆ ಅವರು ಪ್ರಮಾಣ ವಚನ ಸ್ವೀಕರಿಸುವ ಮುನ್ನ ಯಡಿಯೂರಪ್ಪನ ಆಶೀರ್ವಾದ ಪಡೆದುಕೊಂಡಿದ್ದು. ಅದರರ್ಥ ಈ ದೇಶದ ಸಂವಿಧಾನಕ್ಕಿಂತ ಹೆಚ್ಚನ ಬೆಲೆ ಅವರು ಬೆಲೆ ಕೊಡುವುದು ಯಡಿಯೂರಪ್ಪನಿಗೆ. ಅನೇಕ ರೀತಿಯಲ್ಲಿ ಡಿವಿಎಸ್, ಯಡಿಯೂರಪ್ಪನ ಪ್ರತಿನಿಧಿ. ಪ್ರಮಾಣ ವಚನ ಸ್ವೀಕರಿಸಿದ ನಂತರ ಹೊರಟಿದ್ದು ಆರ್ ಎಸ್ ಎಸ್ ಕಚೇರಿಗೆ. ನಂತರ ಆದಿಚುಂಚನಗಿರಿ ಸ್ವಾಮೀಜಿ ಭೇಟಿಗೆ. ಮಾರನೆಯ ದಿನವೇ ತುಮಕೂರಿನ ಸಿದ್ದಗಂಗೆ ಮಠದಲ್ಲಿ ಹಾಜರ್.
ಈಗ್ಗೆ ಹತ್ತು – ಹದಿನೈದು ವರ್ಷಗಳ ಹಿಂದೆ ಶಾಸಕರಾಗಿ ಆಯ್ಕೆಯಾದವರು ಸಾಮಾನ್ಯವಾಗಿ ತಮ್ಕ ಕ್ಷೇತ್ರದಲ್ಲಿ ಒಂದು ಸುತ್ತು ಹಾಕಿ ಗೆಲ್ಲಿಸಿದ ಮತದಾರರಿಗೆ ಧನ್ಯವಾದ ಹೇಳುವ ಪರಿಪಾಠ ಇತ್ತು. ಆದರೆ ಈಗ ಅದೆಲ್ಲ ಇಲ್ಲ. ಮಠಗಳಿಗೆ ಭೇಟಿ ನೀಡುವುದೇ ಇವರ ಮಹತ್ಕಾರ್ಯ. ಸಂವಿಧಾನಕ್ಕೆ ತಕ್ಕುದಾಗಿ ಆಡಳಿತ ನಡೆಸುತ್ತೇನೆಂದು ಪ್ರಮಾಣ ವಚನ ಸ್ವೀಕರಿಸಿದ ಕೆಲವೇ ಕ್ಷಣಗಳಲ್ಲಿ ಸಂವಿಧಾನದ ಮೂಲ ಆಶಯಗಳಿಗೆ ಧಕ್ಕೆ ತಂದಿರುವ ಸಂಸ್ಥೆಗಳಿಗೆ ಭೇಟಿ ನೀಡುವುದೆ ಎಷ್ಟು ಸರಿ? ಹಾಗೂ ಇಂತಹ ನಾಯಕರು ತಮ್ಮ ಅಧಿಕಾರಾವಧಿಯಲ್ಲಿ ಸಂವಿಧಾನಕ್ಕೆ ತಕ್ಕುದಾಗಿ ಆಡಳಿತ ನಡೆಸುತ್ತಾರೆ ಎನ್ನುವುದನ್ನು ನಂಬುವುದಾದರೂ ಹೇಗೆ? ಈಗಷ್ಟೆ ರಾಜೀನಾಮೆ ನೀಡಿ ಮಾಜಿ ಮುಖ್ಯಮಂತ್ರಿ ಎನಿಸಿಕೊಂಡಿರುವ ಯಡಿಯೂರಪ್ಪ ಪ್ರಮಾಣ ವಚನ ಸ್ವೀಕರಿಸಿದ್ದೂ ಇದೇ ಸಂವಿಧಾನಕ್ಕೆ ಬದ್ಧನಾಗಿರುತ್ತೇನೆ ಎಂದು. ಆದರೆ ಬದ್ಧತೆ ಸೀಮಿತವಾಗಿದ್ದು ಕುಟುಂಬಕ್ಕೆ, ಸ್ವಜನರ ಹಿತಕ್ಕೆ.
(ಚಿತ್ರಕೃಪೆ: ವಿಕಿಪೀಡಿಯ)